POSIBILIDAES DE LA
SOLOMBRA
Marta López Fernández
Vuelve Antón García
(Tuña, 1960) a Tinéu, a la novela y al Premiu Xosefa Xovellanos con Crónica
de la lluz y la solombra y failo esta vez pa rescatar la historia de Rafael
González Gancedo, el vecín de La Zorera que foi acusáu de matar a la muyer,
Manuela Martínez de Llano y al fíu qu’acababen de tener, nun crime en
complicidá cola madre d’él, Manuela Gancedo y l’amante, Concha Calzón. Absueltes
les muyeres tres el xuiciu, Rafael foi condenáu a morir a garrote vil y
executáu’l 27 de xunu de 1899 na plaza Las Campas de Tinéu, ante una multitú
qu’acudió a presenciar cómo se cumplía la sentencia. Estos son los
fechos espuestos a la lluz, investigaos nos xulgaos, espublizaos na prensa y difundíos
pola tradición oral colos que pue contar el llector que s’interese pol relatu.
Restolando nel orixe
d’esta traxedia, constrúi l’autor un auténticu drama rural, una dura y
conmovedora novela psicolóxica qu’alluma pa la solombra de les emociones y los
calteres que s’abellugaben dientro de los nomes conocíos: l’home toscu y fuin
esllumáu pola muyer ilustrada y
buena: los díes de lluz, lo muncho que quixo
a Manulina; pero ensiguida la realidá del matrimoniu desigual: aquelles idees qu’ella seique sacaba de los
llibros: emigrar, prosperar, empezar una vida nueva n’otra parte; el
fracasu, la desilusión de la muyer engañada: tanta confianza traicionao y la violencia del home frustráu, aquellos gritos, la griesca permanente.
L’amante perturbadora y dispuesta, el poder del sexu, la felicidá sobre la piel; la suegra alcagüeta y dañina, siempre con una nube negra metida dientro la
cabeza.
Enfoca con habilidá
pa los requexos avesigos d’un amor ocultu, de medrana, sospeches, sobresaltos,
badagüeyos reveladores: Nun me deixes
sola, Meirín. Se me pasa cualquier cousa avisas al miou harmanu. Pasa a escures
peles muertes naquella nueche, naquella casa qu’anubrió’l silenciu y consigue que prienda en nós la solombra de
la duda. Y darréu, l’esbarrumbu: la traición, la soledá, la sentencia terrible
y los pensamientos finales del que yá solo espera pola muerte.
Los últimos díes de
les vides de Manulina y Rafael comparten el formatu d’un diariu, emocionante y
angustiosu, de ritmu áxil, con caminos, procesiones y saltos nel tiempu. Ente medies,
la crónica de la espera: la cárcel y el xuiciu, una narración más sobria,
acordies cola tensión menguada y los personaxes solemnes que dirixen esta parte
de l’acción.
Pero Crónica
tamién ye una afortunadísima novela global, sofitada de fondu sobre una cadarma ambiental fecha con
minuciosidá por un escritor costumista, realista y naturalista que va
ensertando, con gran curiosidá, les necesidaes que precisa pa recrear la
intrahistoria d’Asturies naquella dómina, naquellos llugares, naquelles
esmoliciones.
Un álbum d’escenes
cotidianes que retrata’l mundu duru y probe de los pueblos, la etnografía del
pasáu, la épica de la sobrevivencia, la llucha d’homes y muyeres esclavos y
resistentes: la valiente Lula Arnaldo, el célebre Antonín, el misteriosu
Mero; l’escape que representaba la
emigración, l’argolla del orde establecíu –sobre manera pa les muyeres-, pero
tamién los momentos de disfrute: l’allegría nos díes de fiesta, l’armonía ente
vecinos solidarios.
Una filera de persones, allumaes por un fanal que marcaba
más onde taben ellos que per ónde diba’l camín: xente
col destín escritu pol determinismu,
pola herencia y pola fuerza d’una naturaleza telúrica descrita con almiración y llirismu por un
poeta entregáu: la Fana, esa firida nel
monte; la tarde con un color bermeyu prendíu en cielu; les preses qu’acarretaben agua parecíen
culuebres de plata; el círculu zarraú que yera’l mundu naquella rimada del
monte que tenía la nublina encorrao dientro de la cabeza de cada ser humano.
Les llendes tan
estreches coles que xusticia, política y relixón acobardaben a los humildes, a pesar d’haber persones qu’allampaben
polos cambios: les lluces de Ramón Torre, la impotencia del abogáu Rogelio Barco,
la bondá de Ciarán, los tres col ánimu llóbregu por nun ser quien a conseguir
l’indultu pa Rafael.
Actores o
espectadores, personaxes cultos y populares, reales, famosos, caracterizaos con
muncha eficacia, válen-y al narrador pa colocar focos múltiples y diferentes,
variedá de rexistros y hasta de xéneros, ¿cómo nun recuperar l’artículu
históricu d’Adeflor?, ¿qué meyor
qu’una carta pa suplir l’ausencia d’un personaxe desapaecíu? Y como nun podía
ser d’otra manera, pa da-yos la palabra y reproducir la variante occidental de la llingua que tanto
chocó n’Audiencia d’Uviéu, nuna completa exhibición de dominiu del llinguaxe.
Pasen dos años ente
les dos muertes qu’abren y zarren Crónica conmocionando al llector: la
despidida íntima y silenciosa pa Manulina y el fíu contrasta col espectáculu obscenu
y la fiesta vergoñosa que foi la execución de Rafael y la esposición del so
cadabre durante varies hores. Dos años pa esplicar
la vida o la convivencia coles contradicciones, la llucha ente’l bien ya’l mal,
la realidá y el deséu, el cansanciu de la lluz y la necesidá de la solombra. Pa
consiguir templar la brutalidá de Gancedo hacia la resignación reflexiva cola
que se da a la muerte que-y destina la llei d’unos homes seique tan crueles
como él.
En Crónica
relluma l’oficiu d’un gran escritor que lo ye, al marxe de los xeitos lliterarios,
pol so amor a esta tierra, pol fondu
conocimientu del mundu al que pertenez y por saber arremendalu trescendiendo la imitación y dándo-y vida
propia; pola consideración y el procuru coles espectatives que foi aniciando
nel llector desde’l momentu aquel nel que l’enterrador inespertu empezó a cavar
nesta novela escelente.
[La Nueva España, xueves 7 de mayu de 2015. Suplementu «Cultura» númberu 1092, páxina 1].
