ÍNDIZ DEL NÚMBERU 5-6 DE CAMPO DE LOS PATOS

Campo de los Patos 5-6

Poesía na Gran Guerra 

A un sieglu del aniciu del presente

Faustino Zapico

Robert Graves, poeta mozu na Gran Guerra

Xilberto Llano

Belicismu y pacifismu na poesía en llingua alemana

Xabiero Cayarga

Guillaume Apollinaire: poesía dende la trinchera

Marina Pangua

Poesía

Dellos poemes d’El llibru nuevu

Xuan Bello

Arte

Lucas Santiago: xoyeru

Marta López Fernández

Narrativa

Un diariu pal xuez Oliveros

Quique Faes

Ceux d’Uviéu

José Luis Rendueles

Dos cuentos

Gonzalo G. Barreñada

Les pagues

Pilar Arnaldo Rubio

Locus amœnus

Manuel García Menéndez

Diariu

Páxines de Pozu sin fondu

Pablo Antón Marín Estrada

Traducciones

William Shakespeare: sonetos

Héctor Fernández

Fueyes d’Hipnos

René Char

Traducción y nota de Javier Martínez Concheso

Artículos

Símbolos y metapoesía en Nené Losada Rico

Taresa Fernández Lorences

Enigmes de los clásicos

Xuan Xosé Sánchez Vicente

Sobre la crítica lliteraria na lliteratura asturiana

José Ángel Gayol

Más sobre’l sufixu paraverbal -iola

Xuan Xosé Sánchez Vicente

Goleta de los Patos

Galería fotográfica de tipos populares (1891-1894), Baltasar Cue Fernández, [Alfonso López Alfonso]. Os contos da outra Galicia (Opowiesci Galicyjskie), A. Stasiuk [Victoria Veiguela]. Na cuerda floxa (Primer cuadernu de llectures), Antón García [José Ángel Gayol]. Gentlemen of the Road, Michael Chabon [Xandru Fernández]. Lucas XV, Xel Pereda [Héctor Fernández]. Una güeyada a Mansfield Park nos doscientos años de la so publicación [Eloy Antuña]. Workers, José Luis Valle [Paula Pulgar]. Eternu negociu, Xulio Arbesú [José Ángel Gayol]. El héroe discreto, Mario Vargas Llosa [Vicente García Oliva]. Aproximación a la arquitectura tradicional de los concejos de Cangas del Narcea, Ibias y Degaña, Francisco Xosé Fernández Riestra [Xabiero Cayarga]. Los 154 poemes, K. P. Kavafis [José Luis Piquero]. La pantasma de los relós qu’atrasen, Rubén Sánchez Antuña [Xuan Santori Vázquez]. Entre líneas. Relatos en torno al fútbol y la vida, diversos autores [Rafael Rodríguez Valdés]. Pop piquiñín, Petit Pop [Xosé Anxelu Gutiérrez Morán]. Ilíada y Odisea. El manga, Homero [Ramiro González Delgado]. I am a hero, Kengo Hanazawa [Fonsu Suárez Román]. Aquella xente nunca sabía aú llevaben les carreteres xunta les que vivíen, Héctor Pérez Iglesias [Miguel Allende]. Descripción y Análisis de los Aerolitos que cayeron en el Distrito de Cangas de Onís (Asturias) el día 6 de Diciembre de 1866, J. R. de Luanco [Xe M. Sánchez]. El rostru impenetrable (One-Eyed Jacks), Marlon Brando; Bernabé, Pablo Casanueva [María Alba Niño]. El rostru impenetrable (One-Eyed Jacks) [Damián Barreiro]. Sociofobia. El cambio político en la era de la utopía digital, César Rendueles [Ricardo Candás]

Campo de los Patos 5-6 (2014-2015)

Saltadera

Director: Antón García

Formatu: 165 x 235 mm

Páxines: 384

ISSN: 2173-4119

PVP: 25 €

LA TERTULIA MALORY ESCUEYE ‘MÁS ESPESO QUE L’AGUA’, DE CONSUELO VEGA, COMO MEYOR LLIBRU N’ASTURIANU DEL 2014

[Tomao de Biblioasturias.com]

     La Tertulia Malory, de L’Entregu, escoyó como meyor llibru n’asturianu de tolos editaos nel 2014 el conxuntu de cuentos Más espeso que l’agua, de la escritora ayerana Consuelo Vega. El xuráu tuvo formáu polos escritores Xulio Arbesú, José Luis Rendueles, Pablo Rodríguez Medina, Solinca Turbón, David Fernán, Roberto Corte, Chechu García y Henrique G. Facuriella, que fallaron el premiu nun actu celebráu na tertulia’l 26 de xunu del 2015. El xuráu destacó nel acta del fallu “una magnífica coleición de cuentos qu’algamen con voz sensible, firme y poderosa’l terrén de la maestría narrativa, amosando al llector el delicáu misteriu que s’escuende tres de lo cotidiano, siempre con una prosa esencial, guapa, ensin aditivos. Histories de xente corriente, vides comunes que, gracies a l’habilidá d’una observadora atenta, resulten aventures estraordinaries.”

     El gallardón consiste nuna ilustración d’Alfonso Zapico y una medaya conmemorativa, que se van entregar nun actu públicu en L’Entregu en prósimes feches.

     Esta ye la cuarta vez que’l grupu concede esti premiu, l’añu anterior resultó ganadora Carne de melandru, novela xuvenil de Milio Rodríguez Cueto. Con esti gallardón, los sos entamadores quieren prestixar les lletres asturianes, al empar que se da difusión a les obres que, a criteriu del xuráu, sían consideraes los meyores llibros escritos cada añu n’asturianu.

     Más espeso que l’agua ye una coleición de cuentos onde se recueyen narraciones escrites nel espaciu de venti años, con una voz personal que nos regala maxistrales discursos demográficos como nel relatu Llevaben la comida, o la emocionada señalda del qu’aporta a una patria estraña, qu’atopamos nel cuentu Gouda. Cada relatu va dir enseñando fragmentos de la esistencia de xente cola que topamos a diario, xente que, tres d’una aparente normalidá, escuende traxedies, enormes sacrificios, amores…

     Consuelo Vega (Bustillé, Ayer, 1961). Llicenciada en Filoloxía. Como narradora diose a conocer nel añu 1995 cola obra Cera frío, relatu curtiu col qu’algamó en 1994 el Primer Premiu María Xosefa Canellada de Narrativa. Ye coautora, xunto con Antón García, del ensayu Del centru a la periferia (1993), una interesante reflexón sobre’l procesu hestóricu y cultural que llevó a Asturies de ser centru d’ella mesma a ser periferia d’una entidá superior, amás del trabayu Una mirada a la muyer na historia, del añu 1999. Ye tamién autora de traducciones de Peter Handke y Christine Nöstlinger, ente otros.

MIENTRES NOS AÑEN LES AGÜES

Mientres nos añen les agües

Ana Martínez Sierra

Colección «La fueya azul», 1

154 páxines

15 x 21 cm

ISBN: 978-84-936790-9-5

PVP: 12 €

    La vocación lliteraria acompaña dende siempre a Ana Martínez Sierra (Villanueva de Cangues d’Onís, 1970), anque foi’l pasu polos cursos d’asturianu qu’impartía l’escritor Pablo X. Suárez los que la dicidieron a usar esta llingua. D’unos años p’acá, ensin priesa, vien rexistrando con procuru y verdá les sos esmoliciones y suaños, les sos inquietúes y porgüeyos. En versu y en prosa, con cenciellez y voluntá d’estilu, comunica les impresiones que-y produz el mundu y constrúi personaxes tomaos del natural nuna obra lliteraria en crecimientu, curiada y sincera, na qu’acierta a volcar en palabres guapes y escoyíes un mundu interior ricu en sensaciones y atentu a los detalles.

Ana Martínez Sierra

    Ana Martínez Sierra ta casada y tien dos fíos. Vive dende nena en Nava y trabaya de va ventitrés años na Comarca de la Sidra. En 2015, de la que se publicaba esti llibru, ganó'l Concursu de Cuentos pola Oficialidá del Asturianu que convoca'l Conceyu de Bimenes.

LA PRUEBA DEL ONCE

La prueba del once. Poesía asturiana del sieglu XXI
Una antoloxía fecha por Antón García
Poemes de: Henrique G. Facuriella · Alejandra Sirvent · Pablo X. Suárez · Iván Cuevas
Carlos Suari · Laura Marcos · Sofía Castañón · Rubén d’Areñes
Sergio Gutiérrez Camblor · María García · Xaime Martínez
Bibliografía por Iván Cuevas

16 x 22,5 cm
280 páxines
PVP: 15 €
ISBN: 978-84-936790-8-8
Colección «Llibros del Campo de los Patos», 4

     Les principales antoloxíes de poesía publicaes na última década zarren con Vanessa Gutiérrez, una poeta de referencia nacida en 1980, como si con ella terminara ente nós esti xéneru. La prueba del once ye una invitación a conocer la poesía que sigue, la que da continuidá a la tradición de la llingua asturiana, reconstruyéndola, dignificándola. Son cuatro muyeres y siete homes nacíos ente 1980 y 1993; con ellos pue facese la prueba lliteraria del once, a la manera del clásicu y desusáu cálculu matemáticu de verificación d’operaciones, más fiable que la del nueve.

     Esmolición llingüística, pluralidá de voces, interés por recuperar la plaza pública pa la poesía puen ser dalgunes de les característiques d’un grupu d’autores heteroxeneu. Nesta antoloxía reflesionen sobre llingua de creación y sobre tradición lliteraria personal y colectiva nes respuestes al cuestionariu que se-yos apurrió, amás de na «poética» elaborada a costafecha pal llibru. Cada poeta lleva, xunto con una nota biobibliográfica, una breve presentación lliteraria firmada por un autor distintu en cada ocasión.

     La obra pieslla con una completa bibliografía del periodu elaborada pol poeta Iván Cuevas, onde se pon de manifiestu la vitalidá d’un xéneru que sigue siendo la mapa de les lletres asturianes.

    Antón García (Tuña, 1960) ye poeta, narrador, traductor y investigador d’esta lliteratura, sobre la que tien fechos dellos estudios y recopilaciones. A él correspuende la selección de los poetes incluyíos na Prueba del once y de los poemes que los representen, y quien sintetiza nel prólogu los principales fitos de la nuesa historia poética a través de les antoloxíes, apuntando amás dalgunos de los nomes esenciales de la poesía asturiana d’esti tiempu.

MARTA LÓPEZ COMENTA «CRÓNICA DE LA LLUZ Y LA SOLOMBRA»

POSIBILIDAES DE LA SOLOMBRA

Marta López Fernández

Vuelve Antón García (Tuña, 1960) a Tinéu, a la novela y al Premiu Xosefa Xovellanos con Crónica de la lluz y la solombra y failo esta vez pa rescatar la historia de Rafael González Gancedo, el vecín de La Zorera que foi acusáu de matar a la muyer, Manuela Martínez de Llano y al fíu qu’acababen de tener, nun crime en complicidá cola madre d’él, Manuela Gancedo y l’amante, Concha Calzón. Absueltes les muyeres tres el xuiciu, Rafael foi condenáu a morir a garrote vil y executáu’l 27 de xunu de 1899 na plaza Las Campas de Tinéu, ante una multitú qu’acudió a presenciar cómo se cumplía la sentencia. Estos son los fechos espuestos a la lluz, investigaos nos xulgaos, espublizaos na prensa y difundíos pola tradición oral colos que pue contar el llector que s’interese pol relatu.

Restolando nel orixe d’esta traxedia, constrúi l’autor un auténticu drama rural, una dura y conmovedora novela psicolóxica qu’alluma pa la solombra de les emociones y los calteres que s’abellugaben dientro de los nomes conocíos: l’home toscu y fuin esllumáu pola muyer ilustrada y buena: los díes de lluz, lo muncho que quixo a Manulina; pero ensiguida la realidá del matrimoniu desigual: aquelles idees qu’ella seique sacaba de los llibros: emigrar, prosperar, empezar una vida nueva n’otra parte; el fracasu, la desilusión de la muyer engañada: tanta confianza traicionao y la violencia del home frustráu, aquellos gritos, la griesca permanente. L’amante perturbadora y dispuesta, el poder del sexu, la felicidá sobre la piel; la suegra alcagüeta y dañina, siempre con una nube negra metida dientro la cabeza.

Enfoca con habilidá pa los requexos avesigos d’un amor ocultu, de medrana, sospeches, sobresaltos, badagüeyos reveladores: Nun me deixes sola, Meirín. Se me pasa cualquier cousa avisas al miou harmanu. Pasa a escures peles muertes naquella nueche, naquella casa qu’anubrió’l silenciu y consigue que prienda en nós la solombra de la duda. Y darréu, l’esbarrumbu: la traición, la soledá, la sentencia terrible y los pensamientos finales del que yá solo espera pola muerte.

Los últimos díes de les vides de Manulina y Rafael comparten el formatu d’un diariu, emocionante y angustiosu, de ritmu áxil, con caminos, procesiones y saltos nel tiempu. Ente medies, la crónica de la espera: la cárcel y el xuiciu, una narración más sobria, acordies cola tensión menguada y los personaxes solemnes que dirixen esta parte de l’acción.

Pero Crónica tamién ye una afortunadísima novela global, sofitada de fondu  sobre una cadarma ambiental fecha con minuciosidá por un escritor costumista, realista y naturalista que va ensertando, con gran curiosidá, les necesidaes que precisa pa recrear la intrahistoria d’Asturies naquella dómina, naquellos llugares, naquelles esmoliciones.

Un álbum d’escenes cotidianes que retrata’l mundu duru y probe de los pueblos, la etnografía del pasáu, la épica de la sobrevivencia, la llucha d’homes y muyeres esclavos y resistentes: la valiente Lula Arnaldo, el célebre Antonín, el misteriosu Mero;  l’escape que representaba la emigración, l’argolla del orde establecíu –sobre manera pa les muyeres-, pero tamién los momentos de disfrute: l’allegría nos díes de fiesta, l’armonía ente vecinos solidarios.

Una filera de persones, allumaes por un fanal que marcaba más onde taben ellos que per ónde diba’l camín: xente col destín escritu pol determinismu, pola herencia y pola fuerza d’una naturaleza telúrica  descrita con almiración y llirismu por un poeta entregáu: la Fana, esa firida nel monte; la tarde con un color bermeyu prendíu en cielu;  les preses qu’acarretaben agua parecíen culuebres de plata; el círculu zarraú que yera’l mundu naquella rimada del monte que tenía la nublina encorrao dientro de la cabeza de cada ser humano.

Les llendes tan estreches coles que xusticia, política y relixón acobardaben a los humildes, a pesar d’haber persones qu’allampaben polos cambios: les lluces de Ramón Torre, la impotencia del abogáu Rogelio Barco, la bondá de Ciarán, los tres col ánimu llóbregu por nun ser quien a conseguir l’indultu pa Rafael.

Actores o espectadores, personaxes cultos y populares, reales, famosos, caracterizaos con muncha eficacia, válen-y al narrador pa colocar focos múltiples y diferentes, variedá de rexistros y hasta de xéneros, ¿cómo nun recuperar l’artículu históricu d’Adeflor?, ¿qué meyor qu’una carta pa suplir l’ausencia d’un personaxe desapaecíu? Y como nun podía ser d’otra manera, pa da-yos la palabra y reproducir  la variante occidental de la llingua que tanto chocó n’Audiencia d’Uviéu, nuna completa exhibición de dominiu del llinguaxe.

Pasen dos años ente les dos muertes qu’abren y zarren Crónica conmocionando al llector: la despidida íntima y silenciosa pa Manulina y el fíu contrasta col espectáculu obscenu y la fiesta vergoñosa que foi la execución de Rafael y la esposición del so cadabre durante varies hores. Dos años pa esplicar la vida o la convivencia coles contradicciones, la llucha ente’l bien ya’l mal, la realidá y el deséu, el cansanciu de la lluz y la necesidá de la solombra. Pa consiguir templar la brutalidá de Gancedo hacia la resignación reflexiva cola que se da a la muerte que-y destina la llei d’unos homes seique tan crueles como él.

En Crónica relluma l’oficiu d’un gran escritor que lo ye, al marxe de los xeitos lliterarios, pol so amor a esta tierra, pol  fondu conocimientu del mundu al que pertenez y por saber arremendalu  trescendiendo la imitación y dándo-y vida propia; pola consideración y el procuru coles espectatives que foi aniciando nel llector desde’l momentu aquel nel que l’enterrador inespertu empezó a cavar nesta novela escelente.

[La Nueva España, xueves 7 de mayu de 2015. Suplementu «Cultura» númberu 1092, páxina 1].

CRÓNICA DE LA LLUZ Y LA SOLOMBRA

Crónica de la lluz y la solombra
Antón García
Premiu de novela «Xosefa Xovellanos»
Uviéu, Saltadera, 2015
190 páxines
18 €

     Ye’l martes 27 de xunu de 1899. Son les ocho de la mañana na plaza Las Campas de Tinéu. Mayoral, el famosu verdugu de Burgos, axusta’l corbatín del garrote vil al pescuezu de Gancedo mientres el dominicu padre Ciarán diz a voces el credo. La multitú, aconceyada pa ver esta execución pública, reza con él.

Gancedo na cárcel d'Uviéu en 1899

     Dos años enantes, na braña de La Zorera, Gancedo contaba tar cometiendo un crime perfectu al asesinar a la muyer y al nenu recién nacíu. La denuncia d’un familiar consiguió que la xusticia llegara a pidir tres penes de muerte por esos asesinatos.

     Basada en fechos históricos, Antón García ocúpase nesta novela de facer, ensin tremendismu, la crónica obxetiva d’aquellos sucesos y de la época na qu’ocurrieron. Remana hábilmente’l relatu oral, la documentación histórica y la ficción pa componer un retratu precisu de los personaxes y de les sos llaceries, onde nun falten l’allegría de la vida, l’humor nin l’amor.

     Crónica de la lluz y la solombra afonda nes pasiones humanes y atrapa al llector ensiguida con una prosa áxil y amañosa, devolviendo a la vida, convertíos en lliteratura, a los protagonistes d’un drama que conmovió profundamente la sociedá d’entesieglos.

Antón García (semeya de Pablo Lorenzana)

     Antón García, de Tuña (conceyu de Tinéu), nació n’agostu de 1960. Poeta, narrador y traductor, tien publicaes otres dos noveles enantes d’esta: El viaxe en 1987 y Díes de muncho en 1998 (que lleva cuatro ediciones n’asturianu y ta traducida al español). Tamién editó un breve llibru de relatos, Xente tan cerca (2009).

     Empieza a publicar poesía en 1984; en 2007 recueye la so obra poética nun volume que titula La mirada aliella, traducíu al español en 2011 como La mirada atenta.

     Amás de lliteratura infantil (El pelegrín valiente, 1993) o d’ensayu políticu (Del centru a la periferia, xunto con Consuelo Vega, en 1994), ye autor de dellos llibros qu’estudien la lliteratura asturiana: el manual Lliteratura asturiana nel tiempu (1994), los dos tomos de Xeneraciones y dexeneraciones (2007 y 2011) o Na cuerda floxa (primer cuadernu de llectures), de 2013. Editó la obra d’escritores como González Villar, Acebal, Fernán-Coronas, Ángeles López Cuesta o los narradores de los dos últimos sieglos. Traductor al asturianu d’Álvaro Cunqueiro, Eugénio de Andrade, Joan Vinyoli o Clarice Lispector, fundó y foi director de Llibros de Frou ente 1983 y 1986, y d’Ediciones Trabe ente 1992 y 2007; actualmente dirixe Saltadera y la revista asturiana de cultura Campo de los Patos.   

PRESENTACIÓN N'UVIÉU DE MÁS ESPESO QUE L'AGUA