21/12/15

NEL RÍU LA FAME, PRESENTACIÓN EN TINÉU



     El 19 d’avientu enllenábase’l patiu del Hotel Palacio de Merás de Tinéu p’asistir a la presentación del llibru de relatos Nel ríu la fame de Pilar Arnaldo, editáu por Saltadera. Casi 200 persones acompañaben a l’autora nun actu multitudinariu que contó cola participación d’Esther Fonseca y de Marta López Fernández.

16/12/15

NEL RÍU LA FAME

Pilar Arnaldo
Nel ríu la fame
16 x 22,5 cm
168 páxines
PVP: 20 €
ISBN: 9788494448911

     Pal primer llibru, Pilar Arnaldo escueye contar un momentu extraordinariu qu’ocurre na vida de seis muyeres: una nena qu’alita gracies a l’acción sanadora d’un mineru fugáu; una madre a la que timen los señoritos de la villa por nun saber lleer, pero que ta dispuesta a que la historia nun se repita cola fía; una moza a puntu de parir que crucia sola, durmiendo en monte, la llarga distancia que separa la cárcel de la qu’acaba de salir de la casa onde quier que-y naza la criatura; dos enamoraes a les que l’amante abandona obligándoles a renunciar al amor pal restu de la vida... Y Gloria, recién casada, a la que casi maten de fame na casa que la acueye y qu’esplica a la nieta la reacción violenta que-y va cambiar la vida.
     Seis campesines nun tiempu nel que les families probes nun yeren ames del so destín, de cuando les muyeres taben condenaes a la obediencia y a la resignación. Seis protagonistes que viven na redolada del ríu la Fame, el nome popular del ríu Xinestaza, que son a sobreponese a la calamidá pa enfrentar la vida con determín y valentía y a les qu’esti llibru da voz.

Pilar Arnaldo

     Pilar Arnaldo nació en 1964 na Pontecastru (Tinéu), al pie mesmu del ríu la Fame, onde sigue viviendo. Na infancia descubrió la maxa de la narración oral en Casa Alonso, el chigre tienda de la familia, a la vez que la pasión llectora la ponía en contactu cola lliteratura universal (Dickens, Verne, Lorca, Machado, Márquez...). Llicenciada en Filoloxía Hispánica, el pasu pela Universidá d’Uviéu permitió-y conocer lo meyor de la lliteratura n’asturianu. Foi profesora de secundaria y bachilleratu en Galicia, d’onde volvió con Rosalía, Curros, Celso Emilio Ferreiro o Blanco Amor. Na actualidá da clase nel Institutu de Tinéu, xera que compaxina con tarees de reivindicación y defensa del mundu rural. Nel númberu 5-6 de la revista asturiana de cultura Campo de los Patos publicó’l so primer relatu.

4/12/15

DELLOS FECHOS NA VIDA D'ALEXANDER WATERS


Héctor Fernández
Dellos fechos na vida d'Alexander Waters
14,5 x 20 cm
104 páginas
PVP: 12 €

     Dellos fechos na vida d’Alexander Waters ye un llibru compactu, estraordinariu na so concepción y resultáu, onde se percibe la distancia qu'hai ente l'escritor y el «yo poéticu». Ye, poro, una auténtica novedá nel panorama lliterariu asturianu. Ensin dexar de ser poesía, Héctor Fernández lleva la so propuesta per un camín narrativu (anque utilice un llinguaxe teatral o podamos visualizar les escenes que la componen como si fuera cine, anque tea escritu en versu o vaya acompañada per una banda sonora), desendolcando les distintes voces que conformen los personaxes de la obra dende una perspectiva llírica. Contrasten les acotaciones en prosa colos versos que pon en boca de los distintos actores del drama, llogrando una obra actual, distinta, asombrosa y soberbia al empar, que ruempe cola poesía figurativa pa ufiertar una voz perdurable, oxetiva, que cavilga sobre l'amor, la incomunicación y la violencia.
Héctor Fernández

     Héctor Fernández nació en Lluanco en 1968. Dende va dellos años vive en Canaries por razones profesionales, calteniéndose bien venceyáu a la cultura asturiana. En 2007 publicó'l llibru de poemes Les inciertes aveníes del tiempu. En 2016 va publicar con Saltadera la traducción al asturianu de los sonetos completos de Shakespeare, de los qu'adelantró una parte nel númberu 5-6 de la revista Campo de los Patos.